ભાષા દોષ
હું કેવો ગુજરાતી!
સગવડનું કરું હું સગવડતા
ને અગવડની પણ સદા અગવડતા
'દૃષ્ટિ'નું કરું હું 'દ્રષ્ટિ'
તો પછી સૃષ્ટિનું કરોને 'સ્રષ્ટિ'!
'દ'ને 'ઋ' લાગતાં બને એ 'દૃ'
'દૃ' ને 'દ્ર'નો ભેદ ન હું જાણું
હું તે કેવો ગુજરાતી!
કે ગુજરાતી શુદ્ધ ન પિછાણું
ગુજરાતીમાં થયો હોઉં નિષ્ણાત
તોયે નિષ્ણાંતનો ના'વે અંત!
હોઉં હું પ્રવીણ ને મેધાવી
તોય હૈયે વસે પ્રવિણ ને મેઘાવી
હું તે કેવો ગુજરાતી!
કે ગુજરાતી શુદ્ધ સમજ ના'વી!
'ળ'નો 'ર' કરે એ તો છે પ્રાદેશિકતા
પણ કૃષ્ણનું ક્રિષ્ન કરે એ ક્યાંની સંસ્કારિતા?
હું તે કેવો ગુજરાતી!
કે ગુજરાતીની નથી મને મહત્તા!
ઘૃણાને સદૈવ ધૃણા કહું
સરતચૂકથી લખું સદા શરતચૂક
ઘણા ટોકે, આ બધી માથાકૂટ મૂક
મને વહાલી મારી ગુજરાતી
'બાબુ' કરે અરજ કે ક્યાંય ન કરો ચૂક
હું તે કેવો ગુજરાતી!
- બાબુ સોલંકી
ટિપ્પણીઓ