જહેમત
🟠
*જિતુભાઈની જહેમત*
જન્મવાનું ગમે તો ખરા. x
જન્મવાનું ગમે તો ખરું.✓
– માણસ તરીકે જન્મવાની ઇચ્છા થાય ખરી.
– મને પંખી થવાના વિચારો આવે તો ખરા.
– બાળકને પંખીની જેમ ઊડવાની ઇચ્છા થાય ખરી.
– બાળકને બાળકને પંખીની જેમ ઊડવાનું મન થાય ખરું.
– ખરું શિક્ષણ આપવામાં આવે તો એકેક બાળક રસ લે ખરું. એમ કરતાં કરતાં અનેક બાળકો તૈયાર થાય ખરાં.
– શિક્ષક ભાઈઓ વધુ સજ્જ થાય ખરા.
– શિક્ષિકાઓ વધુ સજ્જ બને ખરી/ ખરાં.
– આપણા વ્યવહારો ખરા શુદ્ધ બની શકે ખરા.
– આપણી વાણી ખરી શુદ્ધ બની શકે ખરી.
– શું; નિઃસ્વાર્થ ભાવે આપણું વારંવાર મળવું શક્ય બને ખરું?
– શું; પૈસા વગર જીવન અટકી જાય ખરું?
– સંવેદનશીલતા તો ક્યારેક સ્ત્રીઓ કરતાં વધારે માત્રામાં અમુક પુરુષોમાં જોવા મળે ખરી.
– બરફીનો એકેક ટુકડો ખરો મીઠો હતો.
– સુખડીનું એકેક ચકતું ખરેખરું મીઠું હતું.
– ભાઈ, તમે તો ખરા છો! ભણવા તો આવ્યા, પણ સાથે નોટબુક ને પેન લાવવાનું ખરું ભૂલી ગયા!
– બહેન, તમે સાથે નોટબુક ને પેન લાવ્યાં છો ખરાં? શબ્દકોશ પણ લાવ્યાં છો એમ?
તમે સજ્જતાને સમજો છો ખરાં.
– તમે રસોઈ ખરેખરી સ્વાદિષ્ટ બનાવી છે હો!
– ભોજન ખરેખરું જોરદાર હતું.
– તમે ખાધું ખરું કે?
– હા, અમે તો ખરેખરનું ખાધું.
– કાકાને ને કાકીને કાલે ઠીક નહોતું તોય બંનેએ બધું જ આરોગ્યું ખરું. બેય ખરા અર્થમાં ખરેખરાં ભોગી.
– દાદા તો ખરા યુવાન છે! આ ઉંમરેય ગિરદી વચ્ચે સ્ટૂટર ચલાવે ખરા.
– દાદી પણ ખરાં નીક્ળ્યાં ! ડર્યા વગર વિશ્વાસથી પાછલી સીટ પર બેસે ખરાં.
એમને થોડાં તો થોડાં દાળભાત તો રોજ જોઈએ ખરાં; સાથે પાપડ પણ ખરો ભાવે!
– તમે તમારી જાતને જ પૂછો : મારાથી આવું ખોટું કરાય ખરું (કે)?
– શું; અગ્રણી થઈને તમને ખોટાં નિવેદનો (કરવાં) શોભે ખરાં?
– છેવટે કાલે મિલનયોગ થયો ખરો. નિર્દંભ ને ખરું ખણખણતું બોલતા ને લખતા ચોગઠવાળા પ્રિય મિત્ર દેવરાજભાઈ ગોપાણી ઘરે આવ્યા ખરા.
– એમની અને એમના મિત્ર માલાભાઈ યાદવની સાથે ખરા જ્ઞાનપૂર્ણ રોચક સંવાદો થયા.
અમારું મળવું ખરું યાદગાર રહ્યું. ફોટા પાડવાની મારી આદત, પણ એ તો ખરું ભુલાઈ ગયું.
મહિનાઓ પહેલાંની વાત એમણે ખરી યાદ રાખી. મોટી બે કોથળી ભરીને ચોગઠનાં અસલ ટબાં ટબાં મીઠાં બોર લાવીને અમને ઉપકૃત કર્યાં. અમને થયું : આમ કોઈએ આપેલું તરત સ્વીકારી લેવું શોભે ખરું? પણ ખરું તો એ કે – કોઈ કશું ખરા પ્રેમથી લાવે તો એને નકારાય ખરું?
– સમયનો અભાવ તો રહેવાનો, પણ આવી રીતે ઉમળકે મળતાં રહેવું ગમે ખરું.
*-જિતુ ત્રિવેદી*
(ફેસબુક પરથી સાભાર)
⚫
ટિપ્પણીઓ